Kristján L. Möller (um fundarstjórn):
Herra forseti. Ég gríp hér tækifærið og kveð mér hljóðs um fundarstjórn forseta til að fá skýringu á því sem gerðist í morgun hjá þeim hæstv. forseta sem situr í forsetastól nú. Þingvörður kom þá með boð og færði fram ósk mína um að ég yrði settur á mælendaskrá í umræðu um hafnalög. Það var greinilega ekki gert. Þetta var sem sagt í fjórða skipti sem þessi ósk var færð fram, en í fyrsta skipti þeim hæstv. forseta sem nú situr í forsetastól. Mig langar aðeins að spyrja út í hverju það sætir að þetta var gert vegna þess að frá því að ég bað um að vera settur á mælendaskrá hafa fjórir ef ekki fimm þingmenn verið settir á skrá á undan mér.
Ég vildi nota tækifærið og fá skýringu hjá hæstv. forseta hverju þetta sætir og við hvaða grein þingskapa stuðst er þegar svo er gert.