Ásta Möller (andsvar):
Herra forseti. Ég er hjartanlega sammála hæstv. heilbrrh. varðandi vanda öldrunarheimilanna. Ég sagði hér áðan og hef sagt það áður að ég tel að á síðustu árum hafi verið töluvert mikið lagt í byggingu hjúkrunarheimila hér í landinu. Þegar við skoðum heilbrigðisáætlun sem samþykkt var á síðasta ári kemur í ljós að gert er ráð fyrir að til sé hjúkrunarrými fyrir 25% þeirra sem eru 80 ára og eldri. En ef við skoðum fjölda hjúkrunarrýma í dag er þetta hlutfall miklu hærra ef við höfum það jafnframt til viðmiðunar að við höfum í rauninni 326 hjúkrunarrými umfram áætlaða þörf.
Það hlýtur að vekja okkur til umhugsunar um það hvort við erum á réttri leið varðandi uppbyggingu öldrunarþjónustunnar og hvort við eigum ekki að leggja meiri áherslu á heimahjúkrun og heimaþjónustu.