Örlygur Hnefill Jónsson:
Herra forseti. Ég vil taka undir með hv. 7. þm. Reykv., Össuri Skarphéðinssyni, um hvað það er mikilvægt að hefja rannsókna- og tilraunaveiðar á þessari merku fisktegund sem hér er til umræðu.
Samfylkingin hefur lagt fram á hinu háa Alþingi þáltill. um að fara í auknar veiðar og rannsóknir á vannýttum fisktegundum. Það er mikilvægt að styðja líka við allt frumkvöðlastarf sem verið er að vinna í þessum veiðum. Einstaklingar eða fyrirtæki eru að fara út á nýjar brautir og fiskveiðiþjóð á að styðja vel við bakið á frumkvöðlum í þessu. Það gildir um þá sem eru að veiða túnfiskinn. Það vil ég segja líka fyrst rætt er um túnfisk --- við erum nú komnir svolítið inn á venjulegt svið hæstv. landbrh. sem hér talar sem utanrrh. --- að á Þórshöfn er veiddur kúfiskur. Það þarf að styðja við bakið á þeim aðilum sem eru að vinna þetta frumkvöðlastarf.