[prenta uppsett í dálka] 19. fundur, 128. lþ.
Árni Steinar Jóhannsson (andsvar):
Herra forseti. Ég veit ekki hvort ég er nokkuð ósammála hv. þm. Karli V. Matthíassyni. Við erum náttúrlega að tala um breytingar á kerfi og ég tel að byggðatenging kvóta sé grunnur þess að ungir menn eins og hv. þm. talaði um geti komið inn í greinina. Það eru dæmi um það í sveitarfélögum sem úthlutað hefur verið til úr pottum að sveitarstjórn hefur tekið ákvörðun um það, raunar á íbúaþingi, að ungir menn ættu að fá þann kvóta til að geta hafið útgerð.
Auðvitað treystum við á dugnað og framsýni þeirra sem eru heima fyrir. Ég hef enga ástæðu til að ætla annað en það muni vera rík hugsun í þá átt, t.d. á grunni byggðakvóta, að hleypa ungum duglegum mönnum inn í greinina. Hluti aflaheimilda eftir okkar hugmyndum fer á markað og það skapar grunn fyrir þessa ungu menn að eflast innan greinarinnar af dugnaði sínum.
