[prenta uppsett í dálka] 20. fundur, 128. lþ.
Ögmundur Jónasson (andsvar):
Herra forseti. Það er rangt að verið sé að selja bankana á góðu verði. Það er verið að selja þá á gjafaprís. Það er glæframennska að selja hlut ríkisins í ríkisbönkunum við þessar aðstæður. Ég tel það vera glæframennsku. Það var glæframennska að tapa 0,5 milljörðum kr. í fjárfestingum erlendis á vegum Landssímans sem er í okkar umsjá og okkar eigu og á ábyrgð Landssímans og á ábyrgð ríkisstjórnarinnar. Það var glæframennska að selja húsið hérna handan við völlinn, Landssímahúsið, fyrir 820 milljónir og leigja það síðan fyrir 8,2 milljónir á mánuði. Hvernig sem litið er á hagsmunagæslu ríkisstjórnarinnar fyrir okkar hönd, fyrir hönd almennings, þá einkennist hún af ábyrgðarleysi og glæframennsku.
