Iðnaðarráðherra (Valgerður Sverrisdóttir) (andsvar):
Hæstv. forseti. Ég get ekki svarað því hvenær úrskurður kemur frá ESA. Það var talað um það sl. vor að hann mundi koma í sumar en hann hefur ekki birst enn. Ég vona því að það styttist í að hann birtist.
Um innflutningsgjöld á sementi get ég ekki fullyrt vegna þess að ég veit ekki á þessari stundu hvort það mundi samræmast reglum Alþjóðaviðskiptastofnunarinnar að fara út í slíkt. Auk þess væri þar um pólitíska ákvörðun að ræða sem ég hef í sjálfu sér ekki ein úrskurðarvald um, það mál mundi heyra undir fjmrh. Ég tel að það þurfi að vera ljóst hvaða möguleika við höfum í því sambandi vegna ýmissa ákvæða og reglna sem við höfum undirgengist.