[prenta uppsett í dálka] 24. fundur, 128. lþ.
Steingrímur J. Sigfússon:
Herra forseti. Ég kem hér til að taka undir með hv. fyrirspyrjanda Jóni Bjarnasyni og lýsa í leiðinni vonbrigðum með að hæstv. menntmrh. boði þá niðurstöðu hvað varðar næsta ár að ekkert verði af áformum um að stofna framhaldsskóla á vestanverðu Snæfellsnesi. Ég tel það mjög spennandi og sama gildir um áformin við utanverðan Eyjafjörð.
Ég er þeirrar skoðunar að það sé alger tímaskekkja, eins og mál hafa þróast í okkar samfélagi, að nemendum gefist ekki almennt kostur á að stunda framhaldsnám frá heimili sínu a.m.k. til 18 ára aldurs. Framhaldsskólar á fleiri svæðum, a.m.k. fyrir tvö fyrstu árin eins og t.d. áform hafa verið um við Eyjafjörðinn, væru stórfellt innlegg í það mál og mikilvægt byggðamál og menntamál hvernig sem á það er litið.
Ég bendi svo á þann möguleika, herra forseti, þó að hæstv. ráðherra telji sig ekki hafa mikla fjármuni, að á þessu þingi verði tekin hin stefnumótandi ákvörðun. Það er hægt að taka stefnumótandi ákvörðun og leggja fram undirbúningsfjárveitingu, merkta undirbúningsfjárveitingu. Þá væri málið a.m.k. í höfn hvað það varðar.
