Margrét Frímannsdóttir:
Virðulegi forseti. Ég þakka hv. fyrirspyrjanda fyrir að taka þetta mál á dagskrá sem vissulega er mjög mikilvægt.
Erindi mitt hingað er einungis það að vekja athygli á því að dreifikerfið sem við búum við og flutningsgetan er slík að ekkert þýðir fyrir okkur að tala um jafnan rétt. Það eru svo margir í dreifbýli landsins sem hafa enga möguleika og engan aðgang að því að stunda nám t.d. í gegnum tölvu. Það er fyrst og fremst vegna þess að dreifikerfið er ekki í lagi og á meðan svo er þá hafa auðvitað ekki allir þegnar landsins jafnan rétt eins og hv. fyrirspyrjandi lagði svo mikla áherslu á.