[prenta uppsett í dálka] 29. fundur, 128. lþ.
Samgönguráðherra (Sturla Böðvarsson):
Herra forseti. Ég tek undir það að stafræn tækni er mjög mikilvæg vegna þess að bæði er um meiri gæði í útsendingu að ræða og meiri afkastagetu, flutningsgetu. Það hefur hins vegar vakið athygli mína að sjónvarpsfyrirtækin hafa ekki sýnt þessu mjög mikinn áhuga satt að segja. Frumkvæðið í þessu máli hefur allt komið frá ráðuneytinu og eftir að Póst- og fjarskiptastofnun vann skýrsluna sem ég nefndi í svari mínu hefur komist skriður á þetta mál. Ég vonast eftir því að sjónvarpsfyrirtækin herði á sínum þætti málsins því að allt er þetta gert í þágu viðskipta og þjónustu sem sjónvarpsstöðvarnar þurfa á að halda þannig að þetta er mjög í þágu þeirra, en auðvitað fyrst og síðast í þágu neytenda.
