Sverrir Hermannsson (andsvar):
Herra forseti. Eini gallinn við ræðu hv. þm. Einars Odds er sá að þetta er í fjórða skiptið sem ég hlusta á hana óbreytta. Ég er farinn að kunna hana utan að og það er nú ekki skemmtilegt álag.
Hann minntist á skattleysismörk. Ég gerði gys að þeirri lagasetningu er ákveðið var að hækka hátekjuskattsleysismörkin á þeim sem hér stendur. Ég minni hins vegar á að eldri borgarar hafa verið sviknir um hækkun á skattleysismörkum. Það er þessi mismunun sem talað er um að skilji eftir þá sem erfiðast eiga.
Það er alveg rétt hjá hv. þm. að Hafrannsóknastofnun er æxli á þeirri kerfisófreskju sem við búum við í sjávarútvegsmálum. Hann ber fullkomna ábyrgð á því eins og aðrir stjórnarliðar.