Ögmundur Jónasson:
Herra forseti. Atvinnulaus maður fær um 73 þús. kr. á mánuði í atvinnuleysisbætur. Skattleysismörkin eru nú sem kunnugt er liðlega 70 þús. kr. og koma þá rúmlega 3 þús. kr. til skattlagningar. Síðan koma stéttarfélagsgjöld, iðgjöld í lífeyrissjóð o.fl. En þegar upp er staðið fær hinn atvinnulausi einstaklingur um 68 þús. kr. í sinn hlut. Af þeim peningum lifir ekki nokkur maður.
Við erum að leggja til 115 millj. kr. framlag í Atvinnuleysistryggingasjóð svo að unnt sé að greiða atvinnulausu fólki desemberuppbót á við það sem launafólk fær í vasann upp á tæpar 40 þús. kr.