Félagsmálaráðherra (Páll Pétursson):
Herra forseti. Þær staðreyndir sem fyrir liggja benda ekki til þess að ástandið sé verra en nokkru sinni áður. Tölur Félagsþjónustunnar í Reykjavík segja okkur að 3.200 höfðu leitað til Félagsþjónustunnar um fjárhagsaðstoð í nóvemberlok á þessu ári. En á árinu 1995 leituðu 3.800 eftir fjárhagsaðstoð. Það er nærtækast að leita til sveitarfélagsins fyrir þá sem ekki geta séð fyrir sér sjálfir því að sveitarfélagið hefur skyldu til þess að aðstoða þá. Og leiðbeiningarnar sem sveitarfélögin fara eftir eru að stofni til frá hv. þm. Jóhönnu Sigurðardóttur, þ.e. frá því að hún var félmrh. Mig minnir að þær hafi verið gefnar út 1992.
Fjárhagsaðstoðin á landsvísu var í lágmarki árið 2000 en þá fengu 2.680 heimili aðstoð. Á árinu 2001 fengu 2.980 heimili aðstoð en í nóvember var fjöldinn á landsvísu orðinn 3.224. Hámarkið var sem sagt árið 1995 þegar heimilin voru 3.800.
Á síðustu missirum hafa verið framkvæmdar nokkrar úttektir sem fjalla um fátækt og tekjuskiptingu. Nefna má vinnuhópinn sem endurskoðaði almannatryggingarnar og skilaði af sér í maí í fyrra. Hagfræðistofnun Háskóla Íslands rannsakaði allítarlega tekjuskiptingu á Íslandi í haustskýrslu sinni 2001 og samkvæmt rannsókn Hagfræðistofnunar háskólans um tekjuskiptingu á Íslandi sem birt var árið 2001, kemur fram að ójöfnuður var mældur í 94 löndum og var Ísland í öðru sæti með jöfnuð.