Jóhanna Sigurðardóttir (um atkvæðagreiðslu):
Herra forseti. Meginefni þessa frv. er framlenging og lækkun á hátekjuskatti og sérstakar viðbótarskattaívilnanir til fyrirtækja. Þingmenn Samfylkingarinnar leggjast gegn því að auka frekari heimildir til að nýta rekstrartöp í tíu ár í stað átta. Jafnframt munum við ekki styðja lækkun á hátekjuskattinum fyrst ríkisstjórnin telur sig ekki hafa svigrúm til að lækka skatta fólks með lágar og meðaltekjur en flytjum brtt. um að persónuafsláttur hækki í samræmi við launavísitölu á næsta ári.
Stjórnarflokkarnir sýna ljóslega með lækkun á hátekjuskattinum og frekari ívilnunum til fyrirtækja að þeir eru enn við sama heygarðshornið, að lækka fyrst og fremst skatta á þeim betur settu en láta þá sem minna hafa milli handanna bera byrðarnar. Því mótmælum við í Samfylkingunni. Við flytjum einnig brtt. í því skyni að styrkja skatteftirlit og auka skilvirkni í framkvæmd skattalaga. Þær brtt. munum við kalla flestar aftur til 3. umr. til að ráðrúm gefist til að ræða þær nánar áður en þær koma til atkvæðagreiðslu.