Pétur H. Blöndal:
Herra forseti. Ég styð frv. í heild sinni sem nauðsynlega og gagnlega breytingu á lögum um fjármálamarkaðinn og aðlögun hans að Evrópska efnahagssvæðinu. Hins vegar hlýt ég að vera á móti þeim sérkennilegu ákvæðum sem ætlað er að grípa inn í deilumál vegna gildandi laga þar sem sú framkvæmd að dæma með lagasetningu fer í bága við þrískiptingu valdsins. Ákvæðum frv. er ætlað að breyta réttaráhrifum gildra samninga milli manna með afturvirkum hætti. Á ég þar við svokallaðar yfirtökuvarnir sparisjóða í 2. mgr. 70. gr. Það er dómstóla að dæma um réttarágreining.
Herra forseti. Þessi framkvæmd minnir á tilskipanir einræðisherra fyrri tíðar. Enn fremur er eignarrétturinn skertur með þessu frv. sem ekki fær staðist stjórnarskrána að mínu mati. Ég segi já við frv. í heild sinni en mun gera grein fyrir afstöðu minni í þeim greinum sem ég er andvígur.