[prenta uppsett í dálka] 54. fundur, 130. lþ.
Forseti (Halldór Blöndal):
Háttvirtir alþingismenn. Þess var minnst í gær að 100 ár voru þá liðin frá því að fyrsti íslenski ráðherrann, Hannes Hafstein, tók til starfa. Þau tímamót marka upphaf Stjórnarráðs Íslands og framfarasóknar á öllum sviðum þjóðlífsins síðustu 100 árin. Þessi tímamót eru einnig markverð í sögu Alþingis því að á þessum degi, 1. febrúar 1904, var þingræðisreglan innleidd í stjórnskipan okkar, þ.e. sú regla að ráðherrar og ríkisstjórn sitji ekki í trássi við vilja meiri hluta Alþingis. Á hana reyndi þegar 1909 og þá reglu teljum við til grundvallarreglna þó að ekki sé hún skýrlega skrifuð í stjórnarskrána.
Ég minntist þess með nokkrum ávarpsorðum við upphaf þingfundar 3. október að þá voru liðin 100 ár frá því að heimastjórnarlögin voru staðfest af konungi. Í dag færi ég ríkisstjórn og Stjórnarráði Íslands árnaðaróskir Alþingis á þessum merku tímamótum.
