[prenta uppsett í dálka] 55. fundur, 130. lþ.
Umhverfisráðherra (Siv Friðleifsdóttir) (andsvar):
Virðulegi forseti. Í tillögu þeirri sem við fjöllum um hér kemur fram í III. lið, Stofnun Vatnajökulsþjóðgarðs, að áfram verði unnið að stofnun Vatnajökulsþjóðgarðs og verndarsvæða sem munu tengjast honum á grundvelli ályktunar Alþingis. Stefnumótunin er því sú að við höldum að sjálfsögðu áfram með það mál og leggjum áherslu á að það sé í forgangi ásamt hinum 14 svæðunum.
Ég býst við því að hv. þm. sé að vísa til þess hvort hægt sé að tilgreina það svæði með einhverjum mörkum. Ég á erfitt með að segja hvort það er hægt eða ekki, það fer eftir því hve sammála nefndin verður í niðurstöðu sinni og hve mikil samstaða skapast um slík mörk á þinginu. Sjálfsagt getur umhvn. skoðað það í umfjöllun um málið þegar það kemur inn í umhvn.
En ég bíð mjög spennt eftir tillögum þessarar nefndar og á von á að þær verði góðar, miðað við það sem ég hef heyrt hingað til.
