[prenta uppsett í dálka] 58. fundur, 130. lþ.
Guðmundur Árni Stefánsson:
Herra forseti. Hér er lagt til að í samþykktum sparisjóða verði kveðið á um rétt viðskiptavina sparisjóða til að taka þátt í útboði á nýju stofnfé. Í ljósi breyttra þjóðfélagshátta og sterkra tengsla sparisjóðanna við starfssvæði sín tel ég nauðsynlegt að hverfa frá því að handvalið sé í flokk stofnfjáreigenda við útgáfu á nýju stofnfé.
Hér er með öðrum orðum lagt til að klúbbarnir verði opnaðir. Sem betur fer hafa stærstu sparisjóðirnir, velflestir, opnað á hóp stofnfjáreigenda á liðnum árum en enn þá eru þeir örfáir eftir sem þurfa að taka sig á. Hér er lagt til að festa það í lög þannig að engin ástæða sé til þess að ætla það að einstaklingum og viðskiptamönnum sé mismunað þegar valið er í þennan mikilvæga hóp. Ég segi já.
