Pétur H. Blöndal:
Herra forseti. Hér fjöllum við um það ákvæði að í stjórn sjálfseignarstofnunar sem ræður öllu í sparisjóðunum eftir hluthafavæðinguna skulu skipaðir aðilar af opinberum aðilum, þ.e. tveimur ráðherrum og sveitarstjórnum. Hér er verið að ræða um ríkisvæðingu sem gengur þvert á stefnu ríkisstjórnarinnar sem hefur verið að minnka áhrif opinberra aðila í atvinnulífinu.
Hér er enn fremur sú breyting sem veldur því að samningar KB-banka og SPRON geti ekki staðist. Hér er sem sagt verið að ráðast gegn ákveðnum samningi sem gerður hefur verið í samræmi við lög. Þetta er brot á réttarríkinu og ég segi nei.