[prenta uppsett í dálka] 63. fundur, 130. lþ.
Fyrirspyrjandi (Guðjón Ólafur Jónsson):
Hæstv. forseti. Á þskj. 680 hef ég lagt fram fyrirspurn til hæstv. menntmrh. um listasafn Samúels Jónssonar.
Þannig háttaði til að ég var á ferð um Vestfirði í sumar og dvaldi þar í viku, sótti m.a. heim Selárdal í Arnarfirði, sem er nú frekar fáfarinn, og var að koma þar í fyrsta skipti. Þá kom ég að Brautarholti í Selárdal en þar bjó eitt sinn maður að nafni Samúel Jónsson. Hann var fæddur 1884 og lést í hárri elli 1969. Samúel Jónsson var alþýðulistamaður, svokallaður naívisti, og honum var einhvern tíma gefið viðurnefnið ,,listamaðurinn með barnshjartað``. Ef ég man rétt var það Hannibal Valdimarsson sem fann honum það viðurnefni.
Á efri árum sínum réðst Samúel í það að byggja kirkju og hús í Brautarholti og bjó einnig til ýmis listaverk sem þar eru á hlaðinu, aðallega úr steinsteypu. Það er sagt að hann hafi byggt kirkjuna í Brautarholti þegar altaristafla sem hann gerði fyrir kirkjuna í Selárdal var afþökkuð.
Hvað sem því líður eru á hlaðinu í Brautarholti í Selárdal í Arnarfirði ákaflega sérstæð og merkileg listaverk sem því miður liggja undir skemmdum. Þessi verk eru farin að grotna og verða brátt að engu verði ekkert að gert.
Ég lít svo á að hér sé um merkileg menningarverðmæti að ræða sem væri mikil synd að færu forgörðum. Þess vegna hef ég lagt fram fyrirspurn til menntmrh. til að vekja athygli á málinu hér á hinu háa Alþingi og spyr hvort hæstv. ráðherra hafi áform um að stuðla að varðveislu listaverka Samúels Jónssonar í Brautarholti í Selárdal í Arnarfirði.
