[prenta uppsett í dálka] 63. fundur, 130. lþ.
Margrét Frímannsdóttir:
Virðulegi forseti. Ég vil byrja á því að þakka hv. þm. Rannveigu Guðmundsdóttur fyrir að taka þetta upp því að töluverð umræða hefur verið um rafræna sjúkraskráningu og hvað hún gæti þýtt fyrir heilbrigðiskerfið í heild sinni. Við höfum heilmikið rætt það að ná þurfi utan um kostnað í heilbrigðisþjónustunni. Ég held að ef rafrænni sjúkraskráningu verði komið á, ekki bara á öllum stofnunum innan heilbrigðiskerfisins heldur einnig hjá sjálfstætt starfandi læknum, þá skipti það höfuðmáli í því að ná utan um kostnað í heilbrigðiskerfinu hvort heldur á lyfjasviðinu eða á lækningasviði. Upplýsingar sem við höfum t.d. frá Landspítala -- háskólasjúkrahúsi segja okkur að hægt væri að draga verulega úr kostnaði Landspítala -- háskólasjúkrahúss ef rafræn sjúkraskráning væri þar komin á.
Ég fagna hins vegar áhuga hæstv. ráðherra og yfirlýsingunni sem mér heyrðist hann gefa okkur hér um að þessu yrði komið á innan tveggja til þriggja ára.
