![](http://www.althingi.is/myndir/althlit.gif)
Dómsmálaráðherra (Björn Bjarnason):
Virðulegi forseti. Ég vil ekki tímasetja þetta nánar en ég tel að margt sé þess eðlis að það sé með tiltölulega skömmum fyrirvara hægt að hrinda því í framkvæmd. Það verður unnið með því hugarfari að málinu.
Varðandi það sem hv. þm. Steingrímur J. Sigfússon sagði vil ég láta þess getið að allt það sem dómsmrn. gerir í þessu er náttúrlega innan þeirra marka sem stefnumörkun ríkisstjórnarinnar mælir fyrir um. Nú vill svo til að ríkisstjórnin samþykkti á fundi sínum nýlega, 6. febrúar ef ég man rétt, stefnu um íslenska upplýsingasamfélagið og þar segir m.a., með leyfi forseta:
,,Unnið verði að undirbúningi miðlægrar kjörskrár til notkunar í sveitarstjórnar- og alþingiskosningum með það að markmiði að kjósandi geti mætt á hvaða kjörstað sem er til að kjósa. Enn fremur verði stefnt að því að hægt verði að nota upplýsingatæknina sjálfa í kosningum á kjörstað. Lagt er til að dómsmálaráðuneytið og félagsmálaráðuneytið vinni sameiginlega að tilraunaverkefni á þessu sviði í næstu sveitarstjórnarkosningum árið 2006.`` (SJS: Nú batnar það.) Þetta er svona skýrt og það hefur verið unnið að þessu á vettvangi ríkisstjórnarinnar hvað sem áhyggjum hv. þingmanns líður. (Gripið fram í.) Nú er búið að móta þessa stefnu af hálfu ríkisstjórnarinnar og fela dómsmrn. og félmrn. að vinna að framgangi þessa máls og ég fullvissa þingmanninn um að það verður að sjálfsögðu gert.
Fyrirspurn hv. þm. Hjálmars Árnasonar var hins vegar ekki um þetta atriði. Þess vegna vék ég ekki að því sérstaklega í svari mínu en stefnan hefur verið mótuð í þessu efni og unnið verður í samræmi við hana.