[prenta uppsett í dálka] 68. fundur, 130. lþ.
Flm. (Hjálmar Árnason):
Virðulegi forseti. Ég mæli fyrir till. til þál. um úttekt á gerð jarðganga í Reynisfjalli sem ég flyt ásamt hv. þm. Dagnýju Jónsdóttur.
,,Alþingi ályktar að fela samgönguráðherra að láta fara fram úttekt á gerð jarðganga í Reynisfjalli í Vestur-Skaftafellssýslu. Úttektinni verði lokið fyrir 1. september 2004.``
Þetta er tiltölulega einföld þáltill. og skýrir sig sjálf. Hugsunin á bak við hana er að láta fara fram úttekt. Þær raddir hafa heyrst hjá heimamönnum og verið á það bent að með jarðgöngum undir Almannaskarð verði þarna að vetri til eini farartálminn frá Hveragerði og alveg austur í Djúpavog og jafnvel lengra. Með mjög vaxandi umferð um Austurland, ekki síst vegna framkvæmda og ýmissa áforma sem þar eru uppi um uppbyggingu á iðnaði í Vestur-Skaftafellssýslu, vilja heimamenn skoða möguleika á að bæta samgöngur sem er mjög skiljanlegt. Jafnframt hefur verið bent á að í langtímaáætlun er minnst á göng í Reynisfjalli í einhverri framtíð. Þess vegna er þessi þáltill. flutt, til að farið verði í að meta kosti, galla og hagkvæmni slíkra ganga. Þannig verður auðveldara að taka afstöðu til málsins í ljósi breyttra aðstæðna og vaxandi umferðar á þessu svæði.
Ég hygg að það þurfi ekki mikið fleiri orð um þetta, virðulegi forseti, og mælist til að að lokinni umræðunni verði málinu vísað til hv. samgn.
