Guðjón A. Kristjánsson (um atkvæðagreiðslu):
Virðulegi forseti. Hér á að fara að greiða atkvæði um mál sem snýr að réttindum launþega í hlutastörfum. Ég vil gera grein fyrir afstöðu okkar í Frjálsl. til þessa máls.
Við munum styðja frv. að undanskildu því ákvæði þar sem segir svo, með leyfi forseta, í 2. gr.:
,,Ákvæði laga þessara taka ekki til starfsmanna ríkis og sveitarfélaga, sem á grundvelli hlutlægra ástæðna fá greitt tímavinnukaup, enda byggist sú undanþága á kjarasamningi, ákvörðun stjórnvalds eða venju í slíkum tilvikum.``
Við teljum að með þessu ákvæði í 2. gr. sé verið að mismuna launþegum með lagaboði og munum ekki styðja þennan hluta frv.