[prenta uppsett í dálka] 73. fundur, 130. lþ.
Sjávarútvegsráðherra (Árni M. Mathiesen):
Herra forseti. Hér er um grafalvarlegt mál að ræða sem hv. þm. hefur hafið máls á. Eins og kom fram hjá honum fór norska strandgæslan um borð í Þorstein EA á fiskverndarsvæðinu við Svalbarða. Við höfum viðurkennt lögsögu Noregs yfir fiskverndarsvæðinu sé byggt á Svalbarðasáttmálanum og svo fremi sem jafnræðis sé gætt á milli allra aðila. Höfum við á þessum grunni viðurkennt að norsk stjórnvöld séu þau eftirlitsyfirvöld sem eigi að fylgjast með og fara með mál af þessu tagi í þeirri lögsögu.
Okkur hefur ekki borist nein tilkynning um málið af hálfu norskra yfirvalda og samkvæmt því sem fram hefur komið í fréttum var gefin út aðvörun til skipstjórans og honum gert að gera breytingar á sínum útbúnaði, sem hann gerði og norska strandgæslan sætti sig við. Ég held að við verðum á þeirri forsendu að líta svo á að þau yfirvöld sem með málið fara á þessum stað og við höfum viðurkennt sem slík, svo fremi sem byggt sé á grundvelli Svalbarðasáttmálans og jafnræðis sé gætt, hafi afgreitt málið.
Hvers vegna norsk stjórnvöld hafi ekki látið okkur vita af málinu held ég að hljóti að byggjast á því að þau telji að málinu sé lokið af sinni hálfu. Það hlýtur, herra forseti, að vera hæpið og vafamál ef mál eru afgreidd af tvennum yfirvöldum í tveimur löndum.
