Össur Skarphéðinsson (andsvar):
Herra forseti. Það er oft hægt að segja langa og djúpa sögu með þögninni. Ég kýs að túlka þögn hæstv. félmrh. við spurningum mínum þannig að svar hans sé í rauninni þetta:
Eftir að lengi hafði horft vænlega um samninga, eins og getur um í grg., strönduðu þeir vegna þess að hæstv. fjmrh. vildi ekki una opinberum starfsmönnum sömu kjara og höfðu tekist í samningum á almenna vinnumarkaðnum.
Ef þetta verður ekki borið til baka tek ég það svo að þögn hæstv. félmrh. við spurningu minni sé í reynd staðfesting á þessu. Kannski er það kjarni málsins.