Dómsmálaráðherra (Björn Bjarnason):
Virðulegi forseti. Varðandi frv. sem ég lagði fram og hefur verið til meðferðar í allshn. hef ég tekið þá ákvörðun að það verði tekið til athugunar í ráðuneytinu í ljósi þeirra umsagna sem fram hafa komið. Var rætt um það í nefndinni í gær og vona ég að hún fallist á það sjónarmið mitt.
Varðandi spurningu hv. þm. Atla Gíslasonar er rétt að svara því að Fangelsismálastofnun bendir á að í 3. mgr. 13. gr. laga um fangelsi og fangavist segir m.a. að við ákvörðun launa skuli tekið tillit til arðsemi vinnunnar og á því byggist þessi mismunur (Gripið fram í: Arðsemi?) á launagreiðslum. Það er það sem Fangelsismálastofnun hefur notað sem viðmiðun í þessu þannig að fyrir þessu öllu eru ákveðnar reglur og ákveðin lög sem menn geta kynnt sér. Síðan verður aftur tekið til við þetta mál á þinginu þegar ráðuneytið mun leggja fram að nýju frv. um fullnustu refsingar.