Landbúnaðarráðherra (Guðni Ágústsson):
Hæstv. forseti. Kannski er hv. fyrirspyrjandi Evrópusinni, ég veit ekkert um það, en ég ætla að fullvissa hana um það að íslenskur landbúnaður er langt á undan landbúnaði í Evrópu hvað varðar hina nýju hugsun. Evrópa öfundar íslenskan landbúnað af því hvar hann er staddur, öfundar íslenskan landbúnað af þeirri náttúru sem við eigum.
Danskur landbúnaður er búinn að gera í vögguna sína. Hann er á flótta frá Danmörku. Menn geta ekki drukkið vatn úr jörðinni nema fara tugi metra niður til að ná því upp þannig að við erum á mörgum sviðum langt á undan hvað þetta varðar. Hins vegar eru þeir kannski í sínum stuðningi búnir að tileinka sér hið fjölþætta kerfi aðeins betur en við og við getum tekið tillit til þeirra.
Hv. þm. Jón Gunnarsson, sem hér talaði, gerir sér ekki grein fyrir því, að sá peningur sem fer til landbúnaðarins, þau 2--3% af fjárlögum, er ekki bara ætlaður bændum. Hann er líka niðurgreiðsla til neytenda. Þetta eru 2--3% af fjárlögum og útgjöld til landbúnaðar hafa verið sílækkandi hlutfall. Ef þetta er tekið af mjólkinni og kjötinu gæti það hækkað verð til neytenda og neytendur ættu ekki aðgang að þessari hollustuvöru. Þetta er öryggisventill Alþingis til þess að allir eigi aðgang að góðum matvælum á sem lægstu verði.
Hins vegar kann að vera að það sé stuðningur við það á hinu háa Alþingi að styrkja íslenskan landbúnað meira í framtíðinni, 2--3% er ekki mikið, 6 milljarðar eru ekki há upphæð því allt kemur þetta til baka.
Ég tek undir með hv. þm. Ástu Ragnheiði Jóhannesdóttur varðandi sauðaost. Það er margt í körfunni sem við þurfum að hugsa um og höfum ekki sinnt. Við höfum samt sem áður fengið styrki og hjálp frá bæði Framleiðnisjóði landbúnaðarins, Byggðastofnun og fleiri aðilum, atvinnuþróunarsjóðum kjördæmanna, til að hjálpa í þessum efnum. Ég sé margar nýjar sólir á lofti og þakka þessa umræðu um landbúnaðarmál og að mér finnst góðan stuðning við grænbók landbúnaðarins og nýja sýn.