Jón Gunnarsson:
Herra forseti. Til hvers er verið að fela Ríkisendurskoðun að leggja í mikla, dýra og vandaða vinnu ef ekkert á að gera með það sem kemur út úr henni? Ef menn hlaupa til, eins og nú er verið að gera, og koma með tillögur um breytingar á lyfjaverði örfáum dögum áður en skýrsla Ríkisendurskoðunar liggur fyrir?
Það sem tillögur lyfjaverðsnefndar munu einfaldlega þýða er að þetta mun koma harðast niður á þeim sem nota lyf að staðaldri og njóta í dag mests afsláttar í formi þess að apó\-tekin gefa afslátt af sjúklingahlutanum. Þær munu einnig koma í veg fyrir alla þá samkeppni sem þó hefur verið á lyfjaverðsmarkaðnum vegna þess að samkeppnin hefur að mestu leyti, eins og flestir vita, legið í því að berjast um sjúklingahlutann. Samkeppnin hefur falist í því að gefa afslætti til sjúklinga. Því hlýt ég að spyrja um leið og ég lýsi undrun minni: Af hverju í ósköpunum var ekki hægt að bíða í örfáa daga og sjá hvað út úr skýrslu Ríkisendurskoðunar kæmi áður en hlaupið var í þetta lítt ígrundaða mál?