[prenta uppsett í dálka] 88. fundur, 130. lþ.
Guðjón A. Kristjánsson (andsvar):
Hæstv. forseti. Ég undrast það að málið skuli vera með þeim hætti að hv. þm. Össur Skarphéðinsson meti það svo að hæstv. utanrrh. sé þeirrar skoðunar að semja beri við Norðmenn undir hvaða kringumstæðum sem er og nánast leggja það með í samningana sem til þurfi. Ég geri mér alveg grein fyrir því að vegna ákvæðanna í loðnusamningnum varðandi sex mánaða fyrirvara til uppsagnar muni slík uppsögn ekki hafa praktískt gildi varðandi veiðar Norðmanna á árinu sem nú er hafið. En ef menn ætla að beita þrýstingi með því að segja samningnum upp verður það að gerast með löglegum fyrirvara og nýta okkur þá stöðu sem upp kemur með því að samningurinn sé í uppnámi fyrir næsta ár. Til þess að það gerist þarf að segja samningnum upp með sex mánaða fyrirvara og mig undrar að það skuli ekki hafa verið skoðað og að mat hv. þm. sé að til þess sé enginn vilji hjá hæstv. utanrrh. að koma okkur í betri samningsstöðu en við erum í í dag.
