Fyrirspyrjandi (Valdimar L. Friðriksson):
Frú forseti. Ég vil byrja á að þakka menntmrh. fyrir svörin og þeim sem hafa tekið þátt í þessum umræðum. Ég tek undir spurningu hv. þm. Hjálmars Árnasonar: Hvenær er í raun tímabært að hefja uppbyggingu skóla í sveitarfélagi miðað við stærð?
Það hefur jafnframt sýnt sig varðandi Borgarholtsskóla, sem Mosfellsbær tók réttilega þátt í að byggja upp, að vegna samgangna er hann nokkuð úr leið nemenda sem vilja sækja hann úr Mosfellsbæ þannig að þeir sækja í aðra framhaldsskóla á höfuðborgarsvæðinu.
Ég vil jafnframt velta því hér upp, úr því að hæstv. menntmrh. hefur alla vega velt því fyrir sér að reisa framhaldsskóla í Mosfellsbæ, að hún gæti t.d. tekið sérstaklega á umhverfismálum og atvinnu- og ferðamálum.