Jóhanna Sigurðardóttir (andsvar):
Hæstv. forseti. Það eru ekki vísindalegar ástæður á bak við töluna, 600 þús. kr. Við skoðum þetta í nefndinni en það liggur fyrir hvað það eru margir sem hefðu fengið minni greiðslur ef þetta hefði verið í gildi á sl. ári eins og ráðherrann nefndi. Þetta hefði bitnað á 195 manns, 178 körlum og 17 konum. Það gæti bent til þess að færri karlar fari í fæðingarorlof þegar komið er að skerðingunni yfir þessu þaki. Þetta verðum við að skoða vegna þess að hin rökin, að setja þak á þetta, eru alveg eins sterk, sérstaklega að við séum ekki að borga úr því sem kemur frá Atvinnuleysistryggingasjóði einhverjum sem er með 1,5--2 millj. kr. í mánaðartekjur meðan við greiðum ekki meira en 90 þús. kr. á mánuði úr Atvinnuleysistryggingasjóði til atvinnulausra.
Ég vil að öðru leyti þakka ráðherra fyrir svörin. Það er tvennt sem hæstv. ráðherra kom ekki inn á væntanlega tímans vegna, hver reynslan væri af 33. gr. varðandi það sem kallað er ósamrýmanleg réttindi, þ.e. þær skerðingar sem geta orðið á umönnunargreiðslum og örorkulífeyri svo dæmi sé tekið og ekki síst kom ráðherrann ekki inn á það sem hann væntanlega gerir í síðara svari sínu, þá mismunun sem er á greiðslu orlofs eftir að fæðingarorlofi lýkur á almenna vinnumarkaðnum og hinum opinbera sem er algerlega óþolandi, herra forseti, og verður að leiðrétta með dómi eða að Alþingi sjálft manni sig upp í að leiðrétta það.