Kristinn H. Gunnarsson:
Herra forseti. Ég vek athygli á því að samkvæmt þeim áætlunum sem fyrir liggja í þessu máli er vissulega um þarfa framkvæmd að ræða en hún hefur mikil áhrif á atvinnuuppbyggingu á svæðinu. Það er ljóst samkvæmt þeim áætlunum sem ég gat um í upphafi að þetta tónlistarhús er að vissu leyti forsenda þess að rekstrargrundvöllur verði fyrir ráðstefnu- og hótelbyggingu við hliðina þannig að í raun er um að ræða ríkisaðstoð til þess að gera atvinnurekstur hagkvæman á þessu svæði. Ég er í sjálfu sér ekki að hafa á móti því. Ég vek athygli á því að m.a. studdi ég hér löggjöf til þess að veita ríkisábyrgð til atvinnuuppbyggingar í Vatnsmýrinni. En ef við ætlum ekki að setja landið endanlega á hliðina þá verða menn að beita ríkisvaldinu með sama hætti annars staðar á landinu. Það er ekki hægt, herra forseti, að svæðistakmarka afl ríkisins eins og ætlað er að gera.