[prenta uppsett í dálka] 97. fundur, 130. lþ.
Kjartan Ólafsson (andsvar):
Herra forseti. Það er af og frá að hæstv. landbrh., þó mikill hestaunnandi sé, hafi eitthvert taumhald á okkur Sunnlendingum. Ég hugsa að ég sé það slyngur hestamaður að ég kunni þá krók á móti bragði hvað það varðar.
Það sem skiptir höfuðmáli er að atvinnulífið, þ.e. hinn íslenski landbúnaður, sætti sig við þær aðstæður sem menntun og rannsóknum á þessu sviði eru sköpuð. Það skiptir líka verulega miklu máli hvaða fjármagn stofnanirnar fá. (ÖS: Hann á ekki að sætta sig við það.) Mér finnst að stofnanirnar hefðu þurft að fá meira fjármagn til að geta staðið sig í stykkinu, bæði hvað varðar menntunina og rannsóknirnar. Ég vil að stofnununum verði búin betri aðstaða með auknu fjármagni, hvort sem þær verða undir menntmrn. eða landbrn.
Ég hef bent á marga góða þætti í samantektinni sem þessar þrjár nefndir unnu fyrir hæstv. landbrh. og ég vil að hún verði tekin inn í umræðuna.
