[prenta uppsett í dálka] 102. fundur, 130. lþ.
Anna Kristín Gunnarsdóttir:
Herra forseti. Ég tek þessi mál hér upp við hæstv. menntmrh. vegna þess að það kemur ítrekað fram í fjölmiðlum landsins að skólameistarar á Íslandi eru mjög áhyggjufullir vegna hinnar fyrirsjáanlegu fjölgunar í framhaldsskólanum í haust. Þeir telja sig væntanlega þar með ekki hafa fengið tryggingu fyrir því hjá menntamálayfirvöldum að þeim verði tryggt fjármagn til þess að taka við öllum þeim nemendum sem sækja í skólana. Það er því brýnt að fá skýra og skorinyrta yfirlýsingu frá hæstv. menntmrh. um að hún muni fara fram á auknar fjárveitingar frá Alþingi til reksturs framhaldsskólanna. Eins og Samf. benti á við umræður um fjárlög fyrir yfirstandandi ár vantar fjármagn til framhaldsskólanna miðað við fyrirsjáanlega fjölgun.
