[prenta uppsett í dálka] 102. fundur, 130. lþ.
Jóhann Ársælsson (andsvar):
Hæstv. forseti. Það kann vel að vera að þetta hafi mikla þýðingu fyrir þá sem selja loðnuhrogn héðan. En það er verið að tala um meira en það að frysta um borð því hér segir, með leyfi forseta, að ,,... óheimilt sé að vinna eða frysta afla sem veiddur er á tímabilinu janúar til apríl um borð og að utan Íslands sé einungis heimilt að landa þeim afla til bræðslu``.
Mér finnst að úr því að svona er orðað hljóti menn að hafa viljað koma algjörlega í veg fyrir að t.d. þessi afli væri frystur eða meðhöndlaður á nokkurn annan hátt en til bræðslu. Ég set við það spurningarmerki hvort þannig eigi að standa að. Þess vegna hafði ég áhuga á að vita hvort óskir hefðu verið uppi frá Færeyingum um að standa öðruvísi að þessum málum. Mér finnst ástæða til að halda það úr því að þetta orðalag er hér í athugasemdunum.
