[prenta uppsett í dálka] 102. fundur, 130. lþ.
Sigurjón Þórðarson (andsvar):
Herra forseti. Ég hef hlustað með athygli á umræðuna og ég get ekki heyrt annað en að hæstv. utanrrh. hafi látið hjá líða að svara tveim spurningum sem komu fram í umræðunni og ég á ekki von á öðru en hann bæti hér úr og svari þeim. Sú fyrri varðar samdráttinn á kolmunnakvótanum. Mig minnir að hv. þm. Magnús Þór Hafsteinsson hafi einmitt spurt út í þann samdrátt, hvers vegna við værum að draga saman veiðar á kolmunna einhliða þegar það væri að koma fram að stofninn væri í mikilli uppsveiflu. Hin spurningin varðaði færeyska fiskveiðistjórnarkerfið. En nú veit alþjóð að hæstv. utanrrh. er guðfaðir íslenska kvótakerfisins og það væri fróðlegt að fá að heyra álit hans, honum hlýtur að vera kappsmál að bera saman færeyska fiskveiðistjórnarkerfið og það íslenska, vegna þess að það færeyska hefur skilað árangri og þingheimur fól ríkisstjórninni að gera úttekt á því. Við höfum mikinn áhuga á því í Frjálsl. að fá að heyra af þeirri úttekt ríkisstjórnarinnar. Og það eru fleiri sem hafa áhuga á því máli, m.a. þingmaður Framsfl., hv. þm. Hjálmar Árnason, en það kom ítrekað fram í kosningabaráttunni að hann taldi jafnvel að þessi þáltill. hefði verið samþykkt og hann skrifaði um það grein í ágætu blaði.
