[prenta uppsett í dálka] 106. fundur, 130. lþ.
Frsm. meiri hluta allshn. (Bjarni Benediktsson) (andsvar):
Virðulegi forseti. Ég þakka fyrir þessa ábendingu.
Eins og ég vék að leggur meiri hluti nefndarinnar áherslu á að rannsókn á erfðaefnum mun fyrst og fremst gagnast í þeim tilgangi að útiloka blóðskyldleika fólks. Að því leyti er ábendingin réttmæt að hugsanlega mun lífsýnatakan í framkvæmd ekki vera fullnægjandi til að staðfesta að um skyldleika sé að ræða. Hins vegar mun rannsókn á erfðaefni gagnast í þeim tilgangi að útiloka að skyldleiki sé til staðar. Að því leytinu til hygg ég að í framkvæmd, þegar skyldleiki hefur ekki verið útilokaður, standi ekki til að Útlendingastofnun fari í víðtækari rannsóknir á erfðaefninu, víðtækari rannsóknir sem væru bæði kostnaðarsamar og hugsanlega flóknar og krefðust þess að lífsýni yrðu tekin af fleiri aðilum sem standa viðkomandi nærri. Í framkvæmd tel ég að niðurstaða erfðarannsóknar sem útilokar ekki skyldleikann yrði túlkuð þannig að skyldleikinn væri staðfestur.
