Kolbrún Halldórsdóttir (andsvar):
Frú forseti. Útlendingarnir lesa ekki útlendingalögin. Það er alveg rétt. En þeir sem starfa eftir útlendingalögunum á Íslandi kunna þau afturábak og áfram. Þeir skynja og lesa í þeim andann. Viðhorf þeirra mótast af lögunum, eðlilega. Þess vegna er hættulegt að hafa tóninn í löggjöf af þessu tagi annað en vinsamlegan. Ekki af því að útlendingarnir geti ekki lesið lögin og skilji þau ekki.
Við erum ekki með fréttir af því á hverjum degi, en við fáum fréttir af því að það gangi ekki auðveldlega að komast inn í landið, jafnvel fyrir fólk sem af eðlilegum orsökum sækir um dvalarleyfi eða atvinnuleyfi hér á landi. Ég vil nefna eitt í því sambandi. Mér finnst algerlega forkastanlegt að úrskurðir Útlendingastofnunar skuli ekki vera opinberir. Það er eitt sem ég held að við hljótum að geta sameinast um að breyta.