Frsm. efh.- og viðskn. (Pétur H. Blöndal) (andsvar):
Frú forseti. Þetta frv. sem við ræðum hér er á forræði þingsins, ekki ráðherrans lengur. Hv. efh.- og viðskn. hefur fjallað um málið þannig að það er á forræði þingsins og ef einhver á að vera faðir þess og móðir eru það væntanlega fulltrúar úr efh.- og viðskn. sem ég veiti forstöðu. Ég er sennilega pabbinn. Málið er ekki munaðarlausara en það.
Hv. þm. sagði að við gerðum lítið í umhverfismálum. Ég er bara ekki sammála því. Ég veit ekki betur en að hv. þm. Hjálmar Árnason hafi komið af stað mjög mikilli tilraun í vetnisvæðingu, tilraun sem hugsanlega getur haft áhrif um allan heim. Það vill svo til, frú forseti, að heimurinn er einn þannig að ef okkur tekst að finna upp nýja vél á Íslandi sem notar vetni og ef það skyldi minnka mengun minnkar það mengun um allan heim. Mengunin er einmitt án landamæra, frú forseti.
Auk þess vil ég benda á að við höfum farið út í stórmiklar framkvæmdir í því að breyta íslenskum fallvötnum í ál sem sparar óhemjumikla mengun. Á sama tíma og við reisum álver á Íslandi er verið að reisa álver í Suður-Afríku sem notar heilu fjöllin af kolum á ári til að framleiða raforku til að búa til það ál. Það er aldeilis umhverfissparnaður fyrir heiminn allan að við skulum framleiða ál á Íslandi.