Frsm. meiri hluta sjútvn. (Guðjón Hjörleifsson) (andsvar):
Virðulegi forseti. Ég þekki ekki þau lánamál sem hv. þm. nefndi en það kemur fram í frumvarpinu að um er að ræða hreina eign. Það virðist vera sú nettóeign sem stendur eftir. Það var rætt töluvert í sjútvn. að hv. þm. Kristinn H. Gunnarsson og Guðjón Arnar Kristjánsson höfðu lagt það til á sínum tíma að ef eftirstöðvar yrðu í þessum sjóði færi hluti þeirra í að gera upp eldri skip. Sú umræða lenti inni á borði ríkisstjórnar og var síðan vísað til hæstv. menntmrh. Samkvæmt lögunum er tekið fram að ef hrein eign verði í sjóðnum þá eigi að verja honum í hafrannsóknir. Þetta er samkvæmt upplýsingum ráðherra sem ég fékk í dag.