[prenta uppsett í dálka] 108. fundur, 130. lþ.
Bryndís Hlöðversdóttir (andsvar):
Virðulegur forseti. Ég vitna í skýrsluna, bls. 81, með leyfi forseta:
,,Nefndin leggur fyrst til að hugað verði að stöðu Ríkisútvarpsins, með það að markmiði að tryggja því trausta stöðu til frambúðar á markaði fyrir hljóðvarp og sjónvarp. Ástæðan fyrir því að þetta er nefnt fyrst er að sú leið felur ekki í sér neina beina íhlutun í málefni einkamarkaðar fyrir fjölmiðla, þótt sterkt ríkisútvarp þrengi auðvitað svigrúm einkaaðila til vaxtar á sama markaði.``
Síðan er beinlínis tekið fram, að sé þetta gert eitt og sér, með öðrum orðum er gert ráð fyrir að þetta gæti dugað eitt og sér. Páll Þórhallsson bendir á það í Morgunblaðinu að það sé skylda ríkja að leita fyrst vægari leiða áður en farið er út í beina íhlutun á borð við þá sem hér er lögð til.
Virðulegi forseti. Þetta stendur í skýrslunni. Nefndin nefnir þessa leið fyrsta til sögunnar og gerir beinlínis ráð fyrir að hún gæti dugað ein og sér.
