Fyrirspyrjandi (Katrín Júlíusdóttir):
Virðulegi forseti. Ég beini spurningu til hæstv. menntmrh. um reiknilíkan sem notað er til grundvallar skiptingar fjárveitinga milli framhaldsskóla. Nú hefur reiknilíkan það sem notað er til útdeilingar fjármuna til framhaldsskólanna verið við lýði í þó nokkur ár og því er komin ágæt reynsla á það.
Fjölmargir hafa orðið til að gagnrýna líkanið, bæði í heild sinni og einnig einstaka þætti þess, og komið hefur í ljós að reiknilíkanið hentar skólunum með afar mismunandi hætti þó svo að markmiðið með reiknilíkaninu hafi verið að jafna aðstæður og koma reglu á framlögin til framhaldsskólanna. Ég tel að kominn sé tími til að fara gaumgæfilega í gegnum þetta flókna líkan af hálfu ráðuneytisins og máta hvern og einn skóla inn í það og meta sérstaklega.
Allmargir vankantar hafa komið fram á líkaninu. Einn er sá að ekki hefur verið nægilegt fjármagn til verkmenntunar sem hefur leitt af sér að aðbúnaður til kennslu er mjög víða úr sér genginn og tækjabúnaður ekki í takt við það sem gerist í atvinnulífinu.
Annar stór galli sem hefur mikil áhrif á rekstur sumra þessara skóla er að framlög til allflestra rekstrarliða eru tengd við nemendafjölda. Þetta veldur því að framlög til t.d. reksturs bókasafns eru háð nemendafjölda, fjöldi starfsmanna safnsins og einnig þrif á skólabyggingum, svo fátt eitt sé nefnt, er allt tengt nemendafjölda. Þetta finnst mér afar sérkennilegt því alla skóla þarf að þrífa þó svo að nemendum fækki. Skólabyggingin minnkar ekki að fermetrafjölda þótt nemendum fækki og grunnkostnaður, svo sem ljós og hiti, lækkar heldur ekki með fækkun nemenda. Þetta hefur valdið framhaldsskólum, sérstaklega úti á landsbyggðinni, nokkrum vanda. Á landsbyggðinni eru meiri líkur á sveiflum og/eða fækkun nemenda vegna þess m.a. að atvinnuástand í ýmsum byggðarlögum hefur verið nokkuð sveiflukennt. Get ég í þessu sambandi nefnt Fjölbrautaskóla Norðurlands vestra sem hefur lent í mikilli fækkun nemenda á undanförnum árum. Það breytir því þó ekki að í skólanum þarf að halda úti ákveðinni lágmarksþjónustu eins og bókasafni og þrifum fyrir þá 200 nemendur sem skólann sækja.
Nemendafjöldi hefur nefnilega svo mismunandi áhrif á mismunandi rekstrarliði. Endurskoðun reiknilíkansins þyrfti að taka tillit til allra ytri aðstæðna sem hafa áhrif á hvern skóla fyrir sig, svo sem staðsetningar og stöðu sveitarfélaga í kring. Í ljósi þess sem hér á undan er sagt vil ég því spyrja hæstv. menntmrh.:
Telur ráðherra að endurskoða þurfi reiknilíkan um skiptingu fjárveitinga milli framhaldsskóla þannig að fjárveitingar til grunnrekstrarliða verði óháðar nemendafjölda?