Fyrirspyrjandi (Björgvin G. Sigurðsson):
Virðulegi forseti. Ég verð að byrja á því að taka undir með síðasta ræðumanni að eftir svar ráðherra varð maður ákaflega litlu nær um hennar eigið viðhorf til málanna. Hér er um stórpólitískt mál að ræða og í allri þróun í íslenskum skólamálum, hvort sem um er að ræða málefni grunnskóla, framhaldsskóla eða háskóla, verður að sjálfsögðu að liggja þar til grundvallar sjónarmið ráðherra menntamála í landinu. Það er alveg morgunljóst og er útilokað að vísa því algerlega yfir á sveitarfélögin, og þó að þau hafi með rekstur skólanna á grunnskólastigi að gera köllum við á hinu háa Alþingi eftir viðhorfum hæstv. ráðherra menntamála til þessa brýna máls.
Ég vísaði í upphafi máls míns til ummæla sem hún viðhafði á menntaþingi Sambands ungra sjálfstæðismanna í febrúar á þessu ári, fyrir einungis þremur mánuðum, og Morgunblaðið tók upp og barði bumbur og hrópaði húrra fyrir og lýsti því yfir að þetta hefðu verið viðhorf blaðsins árum saman og fagnaði þeirri sýn mjög. Þess vegna kallaði ég eftir því í upphafi umræðunnar á hinu háa Alþingi í dag að hæstv. ráðherra menntamála skýrði þessi viðhorf sín en vísaði ekki til þess að sveitarfélögin ættu að gera þetta. Við vitum alveg hvernig málum er háttað hvað varðar rekstur grunnskólanna, það liggur skýrt fyrir. Við erum að kalla eftir viðhorfum hennar til þessara mála í ljósi fyrri yfirlýsinga sem voru aðrar en yfirlýsingar forvera hennar í starfi menntmh. Því er þessi umræða tekin upp í dag til að fá fram hver viðhorf hæstv. menntmrh. eru til reksturs grunnskóla í landinu. Á hverfaskólinn að vera áfram sú þungamiðja jafnræðis og sanngirni í skólastarfi sem hann hefur verið fram að þessu eða ekki? Á að leggja hverfaskólana af að mati hæstv. ráðherra eða ekki? Viðhorf hennar verða að koma inn í umræðuna.