Kristján L. Möller:
Herra forseti. Ég kem upp til að spyrjast aðeins fyrir um störf þingsins og framkvæmd á þessari utandagskrárumræðu sem hér fór fram. Það vakti sérstaka athygli mína að enginn framsóknarmaður tók þátt í umræðunni. Eins og lög gera ráð fyrir hefðu þeir getað sent tvo menn í umræðuna eins og aðrir þingflokkar. Ég vil því spyrja hæstv. forseta hvort einhver mistök hafi átt sér stað og þeir hafi ekki komist að í þessari umræðu eða hvort þeir hafi einfaldlega ekki beðið um orðið.