Arnbjörg Sveinsdóttir (andsvar):
Hæstv. forseti. Eins og við var að búast var auðvitað farið vítt og breitt um sviðið, fram og aftur í sögunni í ræðu hv. þm. og margt skemmtilegt rifjað upp sem auðvitað er alltaf gaman á síðkvöldum í þingsölum. Mér þætti samt skemmtilegra við lok ræðu hv. þm., a.m.k. í fyrri ræðu hans um málið, að reyna að fiska það út úr málflutningi hans hvort hann telji ástæðu til að bregðast við samþjöppun í eignarhaldi á fjölmiðlum á Íslandi í dag. Telur hann ástæðu til að bregðast við þeirri samþjöppun?