Ögmundur Jónasson (andsvar):
Hæstv. forseti. Menn geta talað lengi um mál sem er vanreifað til þess að sýna fram á hvers vegna svo er. Og það hefur komið fram, þótt ég sé ekki í þeim hópi, að mjög margir, bæði innan þings og lögspekingar utan þingsins, hafa varað við því að frv. verði samþykkt vegna þess að það brjóti í bága við stjórnarskrá lýðveldisins. Ég tel að við eigum að taka slík varnaðarorð alvarlega og gefa okkur tíma og ráðrúm til að ganga úr skugga um hvað er hið rétta í því efni.