Hjálmar Árnason (andsvar):
Frú forseti. Heldur fannst mér hv. þm. fara út og suður. Þetta frv. snýst einmitt um val á milli tveggja leiða, þ.e. að þeir sem eru í dagakerfi geti valið sér, annars vegar það að fá 18 daga með takmörkunum eða valið sig inn í kvóta. Lengra nær það ekki, eins og hv. þm. var að gefa í skyn, og menn eiga ekki að velja fram eða aftur. Það eru þessir tveir kostir sem á að velja um.
Hvað varðar brottkast hefur komið fram að m.a. með aðgerðum sem hér hafa verið teknar, með breytingum á lögum, hefur stórlega dregið úr brottkasti. Ég hygg að hv. þingmaður hafi kannski ekki nein vísindaleg rök fyrir því að brottkast sé miklu meira í því kerfi sem við erum með núna eða sóknardagakerfi. Eins og hv. þm. veit var brottkast alþekkt á árum áður þegar hugtakið kvóti var varla einu sinni komið inn í íslenska tungu. Meira að segja eru til margar ljósmyndir af því, frægar af Halamiðum og víðar.