Mörður Árnason:
Forseti. Hér er einkennilegt mál á ferðinni. Skýringar hæstv. umhvrh. eru ekki fullnægjandi á því sem hér kemur fram. Ef það er rétt sem vakin hefur verið athygli á er þetta mjög alvarlegt mál, ekki sæmandi umhvrh. en því miður í stíl ríkisstjórnarinnar.
Ég kem upp til að segja frá því að við fulltrúar stjórnarandstöðunnar í umhvn. höfum ákveðið að krefjast fundar í nefndinni um þetta mál þar sem hæstv. ráðherra eða viðeigandi undirmaður hennar verði til kallaður og látinn skýra nákvæmlega frá þessum málum með þeim skjölum og pappírum sem við eiga.