[prenta uppsett í dálka] 128. fundur, 130. lþ.
Jón Bjarnason (um atkvæðagreiðslu):
Frú forseti. Hér er verið að greiða atkvæði um frumvarp, eiginlega ekki-frumvarp. Þegar það var lagt fram við 1. umr. hljóðaði þetta frv. um stjórn fiskveiða upp á það hvernig ætti að festa dagabátana í sessi, festa sóknarmarkið í sessi og finna því grundvöll. Að vísu voru það sýndartillögur en það var hið yfirlýsta markmið þess frv.
Í allan vetur höfum við verið að fjalla um hvernig mætti styrkja stöðu sóknardagabátanna, styrkja stöðu þessa flota, styrkja byggðirnar sem hafa reitt sig á afla og sókn þessa flota. Þetta hefur verið umræðuefnið í vetur og við höfum verið að vinna að því.
Svo allt í einu er hent hingað inn gjörsamlega nýju frv. beint úr sjútvrn. Þegar við í hv. sjútvn. héldum að við værum að fjalla um málið komu tillögur úr ráðuneytinu sem hljóðuðu upp á það að slá ætti sóknardagakerfið gjörsamlega af.
Ég mótmæli svona vinnubrögðum á Alþingi. Einnig mótmæli ég þeirri stefnu sem hér er verið að taka upp, að slá algjörlega af sóknardagakerfið og setja allt í kvóta. Ég skil hins vegar að þeir sem hafa viljað fá allan fisk á Íslandsmiðum í framseljanlegan kvóta gleðjist.
Þetta er virkilegt ekki-frumvarp og hörmulegt sem við erum að taka hér til afgreiðslu.
