[26:18]

Frsm. minni hluta landbn. (Lúðvík Bergvinsson):

Virðulegi forseti. Hér hafa verið gefnar dálítið sérstæðar yfirlýsingar við lok þessarar umræðu, einkanlega af hv. þm. Ögmundi Jónassyni og hæstv. landbrh. Í þessari umræðu höfum við verið að tala um að kerfið sem hér hefur verið við lýði hafi skilað góðum árangri undanfarin ár. Það hafi breytt umræðunni og samstarf innan verðlagsnefndarinnar hafi reynst nokkuð vel vegna þess að við erum að tala um verndaða atvinnugrein og verðmyndunin getur aldrei orðið nema undir opinberu eftirliti. Það er þessu fyrirkomulagi sem átti að breyta. Það átti að taka þetta undan opinberu eftirliti og færa til framleiðenda og afurðastöðva og opna á þær heimildir.

Við spyrjum: Af hverju eru menn að opna á þessa leið? Það er það skrýtna. Það er afar sérstakt þegar menn koma hér upp og leyfa sér að tala eins og hv. þm. Ögmundur Jónasson sem sagði að í því felist einhver sérstök frjálshyggja að vilja vernda það kerfi sem hér var. (ÖJ: Ég bara hlustaði á ykkar tal.) Það er alveg með ólíkindum, virðulegi forseti, hvernig (Gripið fram í.) stundum er hægt að snúa hlutunum á hvolf.

Ég held að hv. þm. Ögmundur Jónasson geri sér einnig grein fyrir því að í því samfélagi sem við búum, þó að hv. þm. hafi ýmsar athugasemdir við þau markaðslögmál eða markaðskerfið sem við búum við, þá er einfaldlega öflug samkeppni besta kjarabarátta sem til er fyrir almenning á meðan verðmyndun á sér stað á markaði. (ÖJ: Akkúrat. Það er þetta sem ég var að segja.) Það er einfaldlega þannig. (ÖJ: Er það svoleiðis, já?) Hins vegar erum við hér að tala um grein sem lýtur öðrum lögmálum og hefur verið að vinna samkvæmt öðrum lögmálum í þessu kerfi. Núna er hæstv. landbrh. að opna á breytingar á því. Það höfum við gagnrýnt vegna þess að við teljum að á meðan við samþykkjum það fyrirkomulag sem nú er þá þurfi opinbert verðlagseftirlit.

Hvernig getur hv. þm. komið hér upp og sagt að opinbert verðlagseftirlit sem við höfum talað fyrir --- mér skilst að hæstv. landbrh. muni nú gefa yfirlýsingar hugsanlega hér á eftir um að styttra sé á milli okkar en við töldum í upphafi þessarar umræðu --- hvernig er hægt að segja að í því felist einhver frjálshyggja? (ÖJ: Hvað stendur á blaðsíðu 5 í forsætisráðherraskýrslunni sem ...) Virðulegi forseti. Ég er ekki að tala um sjónarmið hæstv. forsrh. eða hluta frjálshyggjudeildarinnar í þeim flokki sem virðist nú vera týnd í þessari umræðu. Ég frábið mér það þegar menn eru að tala um að reyna að vernda fyrirkomulag sem hefur þó reynst ágætlega í þeirri einokunarstarfsemi sem þessi grein er --- við erum að tala um vernd fyrir þessu og mér skilst að hæstv. landbrh. sé allur að koma til og muni koma hér með einhverjar yfirlýsingar --- mér líkar það mjög illa þegar reynt er að setja á það einhvers konar stimpla eins og hér var gert áðan. Ég vil bara að það liggi fyrir í þessari umræðu.

Við höfum talað fyrir hagsmunum bænda. Við höfum áhyggjur af því að ef þeir verða settir undir afurðastöðvarnar og semja beint við þær þá muni hagsmunir þeirra verða fyrir borð bornir. Við höfum áhyggjur af hagsmunum neytenda og við höfum áhyggjur af því að hæstv. ráðherra gangi fyrst og fremst erinda afurðastöðvanna. Við höfum verið að benda á það í þessari umræðu. Að tengja það við þær hugmyndir sem hér voru nefndar áðan þykir mér alveg óskaplega miður.